നിരന്തരം ബാങ്കിങ് സേവനങ്ങള്‍ ആവശ്യമുള്ള ഒരു വിഭാഗമാണ് സംരംഭകര്‍. സംരംഭകര്‍ക്കാകട്ടെ സാധാരണക്കാര്‍ക്കാകട്ടെ, നല്‍കുന്ന സേവനത്തിന് ബാങ്കുകള്‍ പണം വാങ്ങുന്നുണ്ടെങ്കിലും പല ബാങ്കുകളും പലപ്പോഴും മതിയായ സേവനം ലഭ്യമാക്കാറില്ല. ഇത്തരം സാഹചര്യത്തില്‍, അതായത് ദൈനംദിന ഇടപാടുകളില്‍ എടിഎമ്മില്‍ പണമില്ലാതെ വന്നാല്‍, കാര്‍ഡ് ഉപയോഗിച്ച് പണമിടപാട് നടത്തുമ്പോള്‍ ഇടപാട് പൂര്‍ത്തിയാകാതിരിക്കുകയും അക്കൗണ്ടില്‍നിന്ന് പണം പോകുകയും ചെയ്താല്‍, മുന്‍കൂട്ടി അറിയിക്കാതെ വിവിധ ചാര്‍ജുകള്‍ ഈടാക്കിയാല്‍, ക്രെഡിറ്റ് കാര്‍ഡുമായി ബന്ധപ്പെട്ട് പ്രശ്‌നങ്ങളുണ്ടായാല്‍ പരാതിയുമായി ഓംബുഡ്‌സ്മാനെ സമീപിക്കാവുന്നതാണ്.
ആരാണ് ഓംബുഡ്സ്മാന്?
ബാങ്കിന്റെ വിവിധ സേവനങ്ങള്‍ സംബന്ധിച്ച് ഇടപാടുകാര്‍ക്കുള്ള പരാതികള്‍ പരിഹരിക്കുന്നതിന് റിസര്‍വ് ബാങ്ക് ഓഫ് ഇന്ത്യ നിയമിച്ചിരിക്കുന്ന സീനിയര്‍ ഓഫീസറാണ് ബാങ്കിങ് ഓംബുഡ്സ്മാന്.
ബാങ്കിന് പരാതി സമര്‍പ്പിച്ചിട്ടുണ്ടെങ്കില്‍മാത്രമേ ഓംബുഡ്സ്മാന് പരാതി സ്വീകരിക്കുകയുള്ളൂ. അതിനാല്‍ ആദ്യം പരാതി ബാങ്കിന് നല്‍കുക. ബാങ്ക് ഒരുമാസത്തിനകം മറുപടി തന്നില്ലെങ്കില്‍, ബാങ്ക് നിങ്ങളുടെ പരാതി നിരസിക്കുകയാണെങ്കില്‍, നിങ്ങളുടെ ബാങ്കിന്റെ പരാതിപരിഹാര സംവിധാനത്തില്‍ നിങ്ങള്‍ക്ക് തൃപ്തിയില്ലെങ്കില്‍, പരാതി പരിഹരിക്കുന്നതിനായി ബാങ്കിങ് ഓംബുഡ്‌സ്മാനെ സമീപിക്കാം.
എപ്പോള്‍, എവിടെ പരാതി നല്‍കും?
ബാങ്കിന്റെ മറുപടി ലഭിച്ച് (മറുപടി കിട്ടിയില്ലെങ്കിലും) ഒരുവര്‍ഷത്തിനുള്ളില്‍ ഓംബുഡ്സ്മാന് പരാതി സമര്‍പ്പിച്ചിരിക്കണം.
ഏത് ഓംബുഡ്‌സ്മാന്റെ അധികാരപരിധിയിലാണോ നിങ്ങളുടെ ബാങ്ക് ശാഖ, അല്ലെങ്കില്‍ ഓഫീസ് സ്ഥിതി ചെയ്യുന്നത് ആ ഓംബുഡ്സ്മാന് വേണം പരാതി സമര്‍പ്പിക്കാന്‍.
ഓംബുഡ്‌സ്മാന്റെ അധികാരപരിധി
കേരളം, ലക്ഷദ്വീപ്, മാഹി പ്രദേശങ്ങളില്‍നിന്നുള്ള പരാതികള്‍ സ്വീകരിക്കുന്ന ഓംബുഡ്മാന്‍ പ്രവര്‍ത്തിക്കുന്നത് തിരുവനന്തപുരത്താണ്. വിവിധ പ്രദേശങ്ങള്‍ക്കുള്ള ബാങ്കിങ് ഓംബുഡ്‌സ്മാനെക്കുറിച്ചുള്ള വിവരങ്ങള്‍ https://bankingombudsman.rbi.org.in എന്ന വെബ്‌സൈറ്റില്‍ ലഭ്യമാണ്.
കാര്‍ഡുമായി ബന്ധപ്പെട്ട പരാതികള്‍ക്ക് നിങ്ങളുടെ ബില്ലിലെ വിലാസമായിരിക്കും ഓംബുഡ്‌സ്മാന്റെ അധികാരപരിധി ഏതെന്ന് നിശ്ചയിക്കുന്നത്.
എങ്ങനെ പരാതി സമര്‍പ്പിക്കും?
പരാതി സമര്‍പ്പിക്കുന്നതിന് www.bankingombudsman.rbi.org.in എന്ന വെബ്‌സൈറ്റില്‍നിന്ന് ഡൗണ്‍ലോഡ് ചെയ്‌തെടുക്കുന്ന ഫോറം ഉപയോ?ഗിക്കുന്നതാണ് നല്ലത്. ഓണ്‍ലൈനിലും കടലാസില്‍ കൈകൊണ്ട് എഴുതിയും പരാതി നല്‍കാവുന്നതാണ്. നിങ്ങളുടെ പരാതിക്ക് പിന്തുണ നല്‍കുന്ന രേഖകളുടെ പകര്‍പ്പുകള്‍ പരാതിക്കൊപ്പം സമര്‍പ്പിക്കണം.
തികച്ചും സൗജന്യം
പരാതി സ്വീകരിക്കുന്നതിനോ പ്രശ്‌നപരിഹാരത്തിനോ ഓംബുഡ്സ്മാന് ഒരുവിധത്തിലുള്ള ഫീസും ഈടാക്കുന്നതല്ല.
ഏതെല്ലാം ബാങ്കുകള്‍ക്ക് ബാധകമാണ്?
എല്ലാ ഷെഡ്യൂള്‍ഡ് വാണിജ്യ ബാങ്കുകളെക്കുറിച്ചും റീജണല്‍ റൂറല്‍ ബാങ്കുകള്‍, ഷെഡ്യൂള്‍ഡ് പ്രൈമറി കോ–ഓപ്പറേറ്റീവ് ബാങ്കുകള്‍ എന്നിവയെക്കുറിച്ചുമുള്ള പരാതികള്‍ ഓംബുഡ്സ്മാന് നല്‍കാവുന്നതാണ്.
നിങ്ങളുടെ പരാതിക്ക് എന്ത് സംഭവിക്കും?
ഓംബുഡ്സ്മാന് നിയമാനുസൃതമായ ഒരു തീര്‍പ്പുണ്ടാക്കാന്‍ ശ്രമിക്കും. അന്യോന്യം അം?ഗീകരിക്കുന്ന ഒരു തീര്‍പ്പ് സാധ്യമായില്ലെങ്കില്‍, ലഭ്യമാക്കിയിട്ടുള്ള രേഖകളുടെയും വസ്തുതകളുടെയും അടിസ്ഥാനത്തില്‍ ഓംബുഡ്സ്മാന് ഒരു തീര്‍പ്പ് പ്രഖ്യാപിക്കും.
ഓംബുഡ്‌സ്മാനെക്കുറിച്ച് പരാതിയുണ്ടെങ്കില്‍
ഓംബുഡ്‌സ്മാന്റെ തീര്‍പ്പില്‍ തൃപ്തിയില്ലെങ്കില്‍ അപ്പലേറ്റ് അതോറിറ്റിക്കുമുമ്പാകെ അപ്പീല്‍ സമര്‍പ്പിക്കാവുന്നതാണ്. റിസര്‍വ് ബാങ്ക് ഓഫ് ഇന്ത്യയുടെ ഡെപ്യൂട്ടി ഗവര്‍ണറാണ് അപ്പലേറ്റ് അതോറിറ്റി.
