ഈസ്റ്റേണ് ചെമ്മീന്‍ രാജ്യാന്തര ഹ്രസ്വചിത്ര പുരസ്‌കാരം- 2016ന്‌ സൃഷ്ടികള്‍ ക്ഷണിച്ചു. ഗ്ലോബല്‍ കെ മാഗസിന്റെ പ്രസാധകരായ ഗ്ലോബല്‍ ഇനിഷ്യേറ്റീവ്‌ ഫോര്‍ എക്‌സലന്‍സ്‌ ആണ്‌ സംഘാടകര്‍. ലോകത്തെമ്പാടുമുള്ള യുവാക്കള്‍ക്കും മുതിര്‍ന്നവര്‍ക്കുമിടയില്‍ ഹ്രസ്വചിത്രങ്ങള്‍ ആവേശമായി മാറിക്കൊണ്ടിരിക്കുകയാണ്‌. വര്‍ദ്ധിച്ചു വരുന്ന ട്രാന്‍സ്‌ജെന്റര്‍ പ്രശ്‌നങ്ങള്‍ പരിഗണിച്ച്‌ ഈസ്റ്റേണ് ചെമ്മീന്‍ ഹ്രസ്വചിത്ര പുരസ്‌കാരത്തില്‍ ഫോക്കസ്‌ കാറ്റഗറി വിഭാഗമായി ഇത്തവണ ട്രാന്‍സ്‌ജെന്റര്‍ പ്രമേയമുള്ള ചിത്രങ്ങളെ ഉള്‍പ്പെടുത്തിയിട്ടുണ്ട്‌.
സിനിമയുടെ വിവിധ മേഖലകളില്‍ കഴിവുതെളിയിച്ച ഒരുസംഘം വിദഗ്‌ദ്ധരാണ്‌ പുരസ്‌കാരങ്ങള്‍ നിര്‍ണയിക്കുക. ദേശീയ പുരസ്‌കാര ജേതാവായ സംവിധായകന് ഡോ. ബിജു, ബോളിവുഡ്‌ സിങ്ക്‌ സൗണ്ട്‌ വിദഗ്‌ദ്ധനും സൗണ്ട്‌ എന്‍ജിനീയറുമായ ജയദേവന്‍ ചക്കാടത്ത്‌, ആറു തവണ സംസ്ഥാന സര്‍ക്കാരിന്റെ പുരസ്‌കാരം നേടിയിട്ടുള്ള പ്രശസ്‌ത ഛായാഗ്രാഹകന്‍ എം.ജെ.രാധാകൃഷ്‌ണന്‍, 2015ല്‍ ‘ഇവിടെ’യിലൂടെ മികച്ച ചിത്രസംയോജകനുള്ള പുരസ്‌കാരം നേടിയ മനോജ്, കേരള സര്‍വ്വകലാശാല സാംസ്‌കാരിക പഠന കേന്ദ്രം മേധാവിയും നിരൂപകയുമായ ഡോ. മീന ടി. പിള്ള, രാജ്യാന്തര തിയേറ്റര്‍ ആക്ടിവിസ്റ്റും ചെന്നൈയില്‍ നിന്നുള്ള ട്രാന്‍സ്‌ജെന്‍ഡര്‍ ആക്ടിവിസ്റ്റുമായ എയ്‌ഞ്ചല്‍ ഗ്ലാഡി എന്നിവരാണ്‌ ജൂറി അംഗങ്ങള്‍. പ്രമുഖ പത്രപ്രവര്‍ത്തകനായ സിറാജ്‌ ഷാ ആണ്‌ ആര്‍ട്ടിസ്റ്റിക്‌ ഡയറക്ടര്‍.
മികച്ച ചിത്രത്തിന്‌ ഒരു ലക്ഷം രൂപയാണ്‌ സമ്മാനം. നടന്‍/നടി, സംവിധായകന്, ചിത്രസംയോജകന്‍, തിരക്കഥ, ജനപ്രിയ ചിത്രം എന്നീ വിഭാഗങ്ങളിലും പുരസ്‌കാരങ്ങളുണ്ട്‌. സോഷ്യല്‍ മീഡിയയില്‍ ഓഡിയന്‍സ്‌ പോളിലൂടെയായിരിക്കും ജനപ്രിയ ചിത്രം തെരഞ്ഞെടുക്കുക. വിജയിക്കുന്ന സംവിധായകന് ജൂറി അംഗങ്ങളിലൊരാളുടെ അടുത്ത ചിത്രത്തില്‍ സഹായി ആകാന്‍ അവസരം ലഭിക്കുമെന്നതാണ്‌ മറ്റൊരു പ്രത്യേകത.
ട്രാന്‍സ്‌ഡെന്‍ഡര്‍ വിഭാഗം നേരിടുന്ന പ്രശ്‌നങ്ങളെ സമര്‍ഥമായി കൈകാര്യം ചെയ്യുന്ന സിനിമയ്‌ക്കായിരിക്കും പശസ്‌ത സംവിധായകന് ഋതുപര്‍ണഘോഷിന്റെ സ്‌മരണാര്‍ഥമുള്ള ഫോക്കസ്‌ പുരസ്‌കാരം നല്‍കുക.
മല്‍സരാര്‍ഥികള്‍ ഓണ്‍ലൈന്‍ വഴിയാണ്‌ സൃഷ്ടികള്‍ സമര്‍പ്പിക്കേണ്ടത്‌. www.reelmonk.com/chemmeen16 എന്ന വെബ്‌സൈറ്റില്‍ അപേക്ഷാഫോമുകള്‍ ലഭ്യമാണ്‌. ഒരു സൃഷ്ടിക്ക്‌ 1000 രൂപ വീതം പ്രവേശന ഫീസ്‌ നല്‍കണം. അപേക്ഷകള്‍ സമര്‍പ്പിക്കേണ്ട അവസാന തീയതി മെയ് 9, 2016.
ഈസ്റ്റേണ് ഗ്രൂപ്പ്‌ സ്‌പോണ്‍സര്‍ ചെയ്യുന്ന പുരസ്‌കാരത്തിന്‌ ഇന്ത്യയിലെ പ്രമുഖ പി.ആര്‍ ആന്‍ഡ്‌ കമ്യൂണിക്കേഷന്‍ സംഘടനയായ പബ്ലിക്‌ റിലേഷന്‍സ്‌ കൗണ്‍സില്‍ ഓഫ്‌ ഇന്‍ഡ്യ, സുവര്‍ണജൂബിലി ആഘോഷിക്കുന്ന കേരളത്തിലെ പ്രമുഖ തിയേറ്റര്‍ ഗ്രൂപ്പായ ഷേണായ്‌ ഗ്രൂപ്പ്‌ ഓഫ്‌ തിയേറ്റേഴ്‌സ്‌, ഓണ്‍ലൈന്‍ മൂവി പ്ലാറ്റ്‌ഫോമായ റീല്‍ മോങ്ക്‌, ഇവന്റ്‌ മാനേജ്‌മെന്റ്‌ കമ്പനിയായ എര്‍ഗോ കണ്‍സള്‍ട്ടിംഗ്‌ എന്നിവയുടെ പിന്തുണയുമുണ്ട്‌. ഇന്ത്യയിലും രാജ്യാന്തര തലത്തിലും ഹ്രസ്വചിത്ര മേളാ കലണ്ടറില്‍ മികച്ചൊരു പേരായി മാറുകയെന്നതാണ്‌ ഈസ്റ്റേണ് ചെമ്മീന്‍ രാജ്യാന്തര ഹ്രസ്വചിത്ര പുരസ്‌കാരത്തിന്റെ ലക്ഷ്യം. ഇന്ത്യന്‍ ചലച്ചിത്ര ചരിത്രത്തിലെ ക്ലാസിക്കുകളിലൊന്നായ ചെമ്മീന്‍ സിനിമയുടെ സുവര്‍ണജൂബിലി ആഘോഷവേളയില്‍ അതിന്റെ സ്‌മരണാര്‍ഥംകൂടിയാണ്‌ പുരസ്‌കാരത്തിന്‌ ചെമ്മീന്‍ എന്നു പേര് നല്‍കിയിരിക്കുന്നത്‌.
